Suoma álbmotmehciin gallededje jagi 2018 sulaid 3,2 miljon geardde, mii mearkkaša guovtti proseantta lassáneami ovddit jagi ektui. Álbmotmeahccegalledeaddjiid ruhtageavaheami váikkuhus lagašguovlluin lassánii maiddái 2 % ja lea dál badjel 211 miljon euro. Lassánanproseanttat leat molsašuddan sierra jagiid ektui, muhto lassánantrenda lea joatkevaš. Seammá áigge álbmotmehciid bušeahttaruhtadeapmi áitojuvvo njeidojuvvot. Turismma suvdilisvuohta sihke ekonomiija- ja dearvvašvuođaávkkit sáhttet áitojuvvot.
Galledanmearit buot Meahciráđđehusa Luonddubálvalusaid dikšon čuozáhagain ledje jagi 2018 sulaid 6,9 miljovnna. Stáhta vánddardanguovlluid galledanmearit lassánedje juobe 11 %. Buot lassánanlogut čujuhit luondduturismma ja luonddus lihkadeami bivnnutvuođa lassáneamis ja ávkkástallama máŋggabealagiin šaddamis.Maiddái galledeaddjiid vásihan dearvvašvuođaváikkuhus lea ohpit lassánan: galledeaddjiin badjel 88 % vásihit luonddutuvrras lean viehka dahje oalle olu dearvvašvuođa- ja buresbirgejupmeváikkuhusaid. Gaskamearálaččat galledeaddjit árvvoštallet galledeami dearvvašvuođaávkki 110 euro árvosažžan.
Positiivva váikkuhusat geahppánit, jus ruhtadeapmi ii reahkká guovlluid buori dikšumii.
Meahciráđđehusa Luonddubálvalusaid ruhtadeapmi stáhta bušeahtas lea stáhtaekonomiija rámmaid mielde njiedjamin, seammás go galledeaddjimearit sturrot, suodjalanguovlluid mearri lassána ja daid mearkkašupmi buresbirgejupmái ja ealáhuseallimii nanosmuvvá. Geavatlaččat lea ain uhcit ruhta per áššehas.
– Dát lea eandalii šállošahtti danin, ahte álbmotmehciid ja eará luonddučuozáhagaid galledeaddjiid dárbbut leat lassánan ja šaddan sierraláganin ja riikkaidgaskasaš galledeaddjiid mearit lassánit, luonddubálvalushoavda Timo Tanninen Meahciráđđehusas dadjá.
Luonddubálvalusaid doaimma ii sáhte ruhtadit Meahciráđđehusa fitnodatdoaimmaid ekonomalaš bohtosis. Dat máhcahuvvo stáhtii oassin bušeahttaváriide, ja daid geavaheamis mearridit riikkabeaivvit. Dát juohku lea boahtán vuođđolága bokte ja lea siste Meahciráđđehus-lágas.
Meahciráđđehus lea jo ođasmahttán bálvalusaidis vástidit otná beaivve beroštumiid ja váldán eret anus dakkár bálvalusaid, mat leat unnán anus dahje boarásmuvvan. Maiddái eará doaimma goasttádusbeaktilvuođa buoridan doaimmat leat dahkkon, ja olggobeale ruhtadeami ovdii bargojuvvo aktiivvalaččat. Meahciráđđehusa Luonddubálvalusaid doaimma vuođđun lea goittotge stáhta bušeahttaruhtadeapmái, man geahppáneami mielde garvemeahttumit boahtá luonddusuodjalanfierpmádaga dikšuma hedjoneapmi. Dalle maiddái máŋggat servodatlaš ávkkit luonddu- ja kulturárbbi suodjaleapmái, olbmuid dearvvašvuhtii ja buresbirgejupmái, luondduturismii sihke guovlluekonomiijai ja barggolašvuhtii bázášedje oaččokeahttá.
Turismma suvdilvuođa galgá sihkkarastit
Turismma suvdilvuohta lea okta guovddáš dahkkiin Supmii boahtán ja ruovtturiikka turismma ovddideamis.
– Turismma suvdilvuhtii gullet olu sierra oassedahkkit. Lundui vuođđuduvvan turismma dáfus lea deaŧalaš čuozáhagaid luondduárvvuid seailun. Jus álbmotmehciid ja eará bivnnuhis luonddučuozáhagaid bálvalanráhkadusaide ii leat vejolašvuohta investeret, dalle ávkkástallama stivren uhkiduvvo ja dat fas áitá luondduárvvuid, Tanninen lohká.
• álbmotmehciid ja eará čuozáhagaid galledeaddjimearit (suomagillii: www.metsa.fi/kayntimaarat)
• báikkálašekonomalaš váikkuhusat (suomagillii: www.metsa.fi/suojelualueetjapaikallistalous)
• buresbirgejupmeváikkuhusat (suomagillii: www.metsa.fi/kansallispuistojen-terveyshyotyja)
Lassidieđuid addet:
Oppalaččat: Luonddubálvalushoavda Timo Tanninen, tel. 040 661 0033, timo.tanninen(at)metsa.fi
Meannudanvuohki: Spesiálaplánejeaddji Liisa Kajala, tel. 0400 233 571, liisa.kajala(at)metsa.fi