Meahciráđđehus álggahii eaktodáhtolaš luonddukártejeaddjiid almmuhan čuozáhagaid meahccemihtidemiid. Dieđut girjejuvvojit vuogádahkii ja dat veardiduvvojit maŋŋeleappos našuvnnalaš kritearaide.
Birasministeriija ja eanan- ja vuovdedoalloministeriija eai leat vel almmustahttán boares ja luondduviđá vuvddiid našuvnnalaš kritearaid. Suopma lea EU biodiversitehtastrategiija mielde čatnasan suodjalit boares ja luondduviđá vuvddiid ja stáhta eatnamiid oasil dát guoská vuvddiide, maid Meahciráđđehus hálddaša.
“Meahccebadji lea Suomas mihá oanehaš. Inventerejeaddjit galge álggahit meahccemihtidemiid, vai astat fuolalaččat gieđahallat čuozáhagaid mearrádusbargama doarjjan. EU vuordá, ahte stáhta eatnamiid oasil boares vuvddiid kárten lea ollašuhttojuvvon jagi 2025 beallemuttu rádjái”, Metsähallitus Metsätalous Oy fitnodatjođiheaddji Jussi Kumpula gávnnaha.
Iešguđet čuozáhagaid dieđut girjejuvvojit kártáfiillaide ja dat veardiduvvojit našuvnnalaš kritearaide, go dat leat almmustahttojuvvon. Inventerejeaddjit mihtidit ee. muoraid agi ja ceaggo- ja eatnansuostamuoraid saddjáivuođa. Dasa lassin čielggadit ovdamearkka dihtii stohkiid ja sorvviid gávdnoma. Visuálamihtu vuođul ohcet maiddái ovddit vejolaš vuovdegieđahallama luottaid, dego jalgŋáid, rávarokkiid ja geidnosiid. Inventerejeaddjiid dárkkodeamit vuođđuduvvet EU luondduviđá ja boares vuvddiid meroštallamii guoski kommišuvnna háltelinjjáide.
Metsähallitus Metsätalous Oy lea rekryteren inventerenbargguide 36 mearreáigásaš vuovdeáššedovdi. Inventerejeaddjit árvvoštallet meahcis vuvddiid, mat vejolaččat devdet suodjalankritearaid dán ja boahtte jagi meahccebajis. Inventerenvuloš viidodat lea juobe čuohteduhát hektára ja dan váldodeaddu lea Sámis, gos lea eanemus vuorddehahtti gávdnat čuozáhagaid, mat devdet kritearaid.
Vuovdeáššedovdiid skuvlejedje ja láidestedje vuogádagaide miessemánus. Meahcceinventeremat leat álggahuvvon eaktodáhtolaš luonddukártejeaddjiid doaimmahan čuozáhatdieđuid mihtidemiiguin.
”Meahccedárkkodeamit leat Sámi vuhtiiválddekeahttá čađahuvvon juo olles Suomas”, Jussi Kumpula muitala ja joatká: “ Sávvamis našuvnnalaš kritearat dohkkehuvvojit fargga, vai mii beassat veardidit mihtidanbohtosiid daidda ja gárvet inventerema.”
Olggobeale árvvoštalli gieđahallá vuosttaš meahccebaji inventerema bohtosiid ja daid birra dieđihit jagi 2024 loahpageahčen.
Ulbmilin lea suodjalit gávdnon čuozáhagaid, mat devdet našuvnnalaš kritearaid, luonddusuodjalanguovlun dahje oassin Meahciráđđehusa guovlluekologalaš fierpmádagas. Meahciráđđehusa birasrávagirjjážis meroštallojuvvon luonddučuozáhagat, mat gávdnojit inventeremis, guđđojuvvojit maiddái vuovdedoallodoaimmaid olggobeallái.
Lassidieđut:
Metsähallitus Metsätalous Oy, fitnodatjođiheaddji Jussi Kumpula, tlf. 0400 388 614, jussi.kumpula(at)metsa.fi
Lassidieđut interneahtas:
Dieđut Meahciráđđehusa ollašuhttin inventerenprošeavttas
EU luondduviđá ja boares vuvddiid meroštallan, kárten, čuovvun ja čavga suodjaleapmái guoski komišuvnna háltelinjját