Meahciráđđehus lea mieđihan biras- ja innovašuvdnabálkkašumi fidnui, mas kártejedje gáidduskártenmateriálaid ja mášenoahppanvugiid ávkkástallamiin measta golbma miljon hektára Davvi-Sámi suodjalan- ja meahcceguovlluid. Fidnu buvttadii seammás áiggedási dieđuid dálkkádatnuppástusa váikkuhusain davvi lundui.
Meahciráđđehusa biras- ja innovašuvdnabálkkašupmi jagi 2022 lea mieđihuvvon Davvi-Sámi gáidduskártenprošektii. Sáhka lea Meahciráđđehusa ja Suoma birasguovddáža oktasašprošeavttas, man mihttomearri lea beaivádit boarásmuvvan, 1990-logus čoggojuvvon luonddutiipadieđu sihke geahččalit ja ovddidit ođđa kártenvugiid suodjalanguovlluin.
– Áiggedási luonddudiehtu lea dehálaš earet eará dálkkádatrievdama váikkuhusaid árvvoštallamis. Seammá áigge dieđu čoaggin ná viiddis guovllus ii livčče lihkostuvvan árbevirolaš vugiiguin. Earret eará balsajekkiid geahppáneapmi dálkkádatrievdama mielde oidno kártenbohtosiin, muitala fidnu prošeaktakoordináhtor Anna Tammilehto Meahciráđđehusas.
Prošeavttas kártejedje jagiin 2020-2022 measta golbma miljon hektára Davvi-Sámi suodjalan- ja meahcceguovlluid. Guovlluid luonddutiipa-inventeremiin ávkkástalle gáidduskártenmateriála ja mášenfihtu, man oahpahedje dovdat sierra luonddutiippaid. Oahpahanmateriálan ávkkástalle luonddus 4500 iskkusguovllus čoggojuvvon luonddutiippadieđu.
– Prošeavttas ávkkástalle vuovdedoalus jo anus lean gáidduskártenvugiid ođđa ja innovatiivvalaš vugiin luonddutiippaid guoskevaš dieđu beaivádeapmái. Dát dagai vejolažžan dárkilis ja áiggedási luonddudieđu čoaggima goasttádusbeaktilis vugiin hui viiddis guovllus. Prošeavtta bohtosat ovddidit bealistis Meahciráđđehusa strategalaš mihttomeriid luonddujávkama ja dálkkádaga rievdama goahcamis, deattuha Meahciráđđehusa váldohoavda Juha S. Niemelä.
Gáidduskártenprošeakta lea earenoamáš buorre ovdamearka das, makkár ávkkiid digitálalisašuvnnain sáhttá fáhtet. Prošeavttas buvttadedje mášenoahppanvugiiguin dárkileamos materiála, maid Davvi-Sámi suodjalan- ja meahcceguovlluid luonddutiippain ja luonddudilis leat goassige buvttadan. Bohtosiid sáhttá ávkkástallat earret eará raporteremiidda, nuppástusaid čuovvumii, luonddutiippaid áittavulošvuođaárvvoštallamii sihke guovlluid dikšuma ja geavaheami plánemii.
Biras- ja innovašuvdnabálkkašupmi addojuvvui 23.5. Davvi-Sámi gáidduskártenprošeavtta prošeaktakoordináhtor Anna Tammilehtoi sihke fidnu plánemis ja ollašuhttimis vástidan Arto Saikkosii ja Elisa Pääkköi.
Biras- ja innovašuvdnabálkkašumiin Meahciráđđehus háliida movttiidahttit iežas bargoveagas ovddidit innovatiivvalaš ja luonddudili ovddidan čovdosiid. Bálkkašupmi mieđihuvvo jahkásaččat olbmui, jovkui dahje fidnui, mii ovddida innovašuvnna, doaimma dahje álgaga bokte Meahciráđđehusa guovddáš birasmihttomeriid dego luonddu máŋggahámatvuođa lasiheami, dálkkádatrievdama goahcama, luondduváriid suvdilis dikšuma, suvdilis luondduturismma dahje birassuodjaleami.
Lassedieđut:
Prošeaktakoordináhtor Anna Tammilehto, Meahciráđđehus, tel. 0206 39 6040
Váldohoavda Juha S. Niemelä, Meahciráđđehus, tel. 0206 39 4201