Meahciráđđehusa guovlolobiin bivdán ealgajoavkkut galget dás ovddasguvlui dahkat almmuhusa juohkehaš ealgga goddimis golmma jándora siste. Mearrádus guoská badjel duhát ealgajoavkku, main leat oktiibuot badjel 25 000 bivdi. Dárkilastin guovlolobi eavttuide lea addojuvvon bivdiid iežas sávaldagas.
Mearrádus ii guoskka Davvi-Suomas báikkálaš vuoigatvuođain bivdán joavkkuid, dušše beare daid olgobáikegottálaččaid, geat ohcet Meahciráđđehusas guovlolobi ealgabivdui.
Ealgajoavkkut sáhttet almmuhit goddimiin Oma riista -bálvalusas. Juos joavku ii sáhte mearreáiggi siste almmuhit goddimis Oma riista -bálvalussii, almmuhus dahkkojuvvo vuos guovllu meahccebearráigeahččái.
Golmma jándora almmuhusgeatnegasvuohta guoská buot ealgajoavkkuid, mat leat ožžon Meahciráđđehusas guovlolohpemearrádusa.
– Mii leat ožžon bivdiin valjit máhcahaga das, ahte goddon ealggaid galggašii almmuhit johtileappot go dál, go dasa gávdno buorre vuogádat. Stuorra oassi bivdoservviin ja -joavkkuin dahketge ná, muhto eai buohkat”, dadjá meahccebearráigeahču allagohcci Juha Ahonen Meahciráđđehusas.
Meahciráđđehusa ásahan eaktu lea dárkilut go bivdinásahusas. Ealgga sálašalmmuhusgeatnegasvuođas mearriduvvo bivdinásahusa 9 §:s. Ásahusa mielde almmuhusa ferte dahkat čieža jándora siste bivdinlobis lean goddimiid ealgadihtomeari dievvamis. Juos ealggat leat báhcán bivddekeahttá, almmuhusa galgá dahkat čieža jándora siste ráfáidahttináiggi álgimis dahje ealgabivdinbaji nohkamis.
Almmuhus sáhttá ná vatnat ođđajagimánnui, vaikko vuosttas ealga livččii goddojuvvon juo álgočavččas. Bivdiid gaskkas leatge šaddan eahpádusat das, ahte eai buot joavkkut leat almmuhan goddojuvvon ealggaid. Lea eahpiduvvon, ahte álgočavččas goddojuvvon ealga lea guđđojuvvon iešdáhtolaččat almmutkeahttá, man maŋŋá ealggat leat bivdojuvvon badjel lobálaš dihtomeari.
– Dákkáraš nu gohčoduvvon verrošemiid dahje eahpiduvvon rihkkosiid čielggadeapmi lea leamašan váttis, go sálašin ožžojuvvon ealggaid almmuheapmi sálašregistarii sáhttá dáhpáhuvvat easkka ođđajagimánu loahppageažis, Juha Ahonen gávnnaha.
Almmuhusgeatnegasvuohta juo golmma jándora siste álkidahttá bearráigeahču. Sálašalmmuhusa lea álki dahkat dakkaviđe Oma riista -bálvalussii dahje meahccebearráigeahččái, gean oktavuođadieđut gávdnojit Eräluvat.fi-siidduin ja gean oktavuođadieđuid bivddu jođiheaddji sáhttá gárvásii vurket iežas mátketelefovdnii.
Juos ii čuovo sálašalmmuhusgeatnegasvuođa, dat sáhttá vearrámus dáhpáhusas dagahit guovlolobi eretgeassimii ja ealgabivdima gaskkalduhttimii gažaldatvuloš bajis. Golmma jándora njuolggadusa ánssus eiseválddiin leat buoret vejolašvuođat seahkanit eahpiduvvon boasttugeavahusdáhpáhusaide.
Lassidieđut (suomagillii)
Meahccebearráigeahču allagohcci Juha Ahonen, 040 646 4250, Meahciráđđehus
Meahcccebivddu allagohcci Ahti Putaala, 040 827 2574, Meahciráđđehus