Meahciráđđehusa Luonddubálvalusat rievdada meahccejohtalusluottaid báikki Eanodagas, go dálá luottat eai dávis mohtorsihkkeliin, njealje-/guđajuvllagiin dahje meahccebiillain vuodján gieldda olbmuid duođalaš vuodjinjohtolagaid. Gieldda olmmoš galgá boahttevuođas meahccejohtaluslobi ozadettiin muitalit, masa son áigu ávkkástallat lobi ja maid johtolagaide.
Gieldda olbmot sáhttet kommenteret ođđa meahccejohtalusluottaid sajádaga 31.5. rádjai.
Meahccejohtalusluottaid sajádahkii sáhttá váikkuhit go vástida jearahallamii: https://new.maptionnaire.com/q/9ou8tmd3rjw4 (suomagillii).
Boahtte gease meahccejohtalussii jearahallama buktán nuppástusat eai vealttakeahttá geargga, muhto dat bohtet fápmui geasseáigodahkii 2024.
Meahciráđđehusa mihttomearrin lea eastadit luonddu gollama ja stivret meahccejohtalusa daidda luottaide, maid olbmot geavahit. Meahccejohtalus lea lobálaš Suoma golmma davimus gieldda olbmuide bievlan dušše iežas ruovttugieldda sohppojuvvon meahccejohtalusluottain, ii eará sajiin.
– Min evttohusas Eanodagas lean lobiid leat sirdán maiddái dohko, gos johtin lea álkit. Leat maiddái guhkidan muhtin luottaid, go dál muhtun luottat nohket báikái, gos ii leat mihkkige. Muhtun ovttaskas lobiid leat váldán eret go dat dolvo ovttaskas priváhta bartta šilljui, álbmotmeahccehoavda Pekka Sulkava Meahciráđđehusa Luonddubálvalusain muitala.
Gieldda olmmoš dárbbaša álo lobi meahccejohtalussii
Meahciráđđehus muittuha, ahte gieldda olmmoš dárbbaša álo lobi, jus son háliida lihkadit meahcis mohtorfievrruin. Meahccejohtalus lea lobálaš dušše dalle, jus gieldda olmmoš áigu ávkkástallat luonddu. Lobi oažžu ovdamearkan lubmema, meahccebivddu ordnema, guollebivddu, fatnasa doalvuma ja luonddubuktagiid čoaggima váras daidda luottaide, maid duohtavuođas ávkkástallá. Buot ohcciide lobiid eai automáhtalaččat mieđit juohke báikái.
Eanodaga ja Ohcejoga gieldda olbmuide lobiid sáhttá mieđihit bievlla áigái dušše kárttaide merkejuvvon sohppojuvvon meahcceluottaide dihtomearreáigodaga áigái. Álbmot- ja luonddumeahcis meahccejohtaluslobiiguin ii oaččo vuodjit.
Meahciráđđehus muittuha maiddái, ahte gieldda olbmo lobiin ii oaččo hárjehit fitnodatdoaimma, jus das ii leat sierra sohppojuvvon.
Lassedieđut:
Duottar-Sámi luondduguovddáš, t. 0206 39 7950, tunturi-lappi(at)metsa.fi