Meahciráđđehusa Guođohanvahkut leat farga fas ohcanláhkái. Bivnnuhis geassevásáhussan badjánan sávzaguođoheapmi lea hui dehálaš luonddudikšun. Boahtte geasi guođohit oktiibuot 15 sierra báikkis.
Jagi 2020 guođohanbáikkiide boahtá okta báiki lasi: Punkaharju. Pihlajavesi gáttis, alla buolžža alde lean ovddeš buollinfávtta dállu fállá ođđalágan eanet urbána vuogi vásihit sávzaguođoheaddji eallima. Dát spiehkkasa eará báikkiin go lea eanadatdikšun- ja kulturárbebáiki.
Ohcan guođoheaddjin álgá gaskavahku 15.1.2020 dmu 12 ja joatkašuvvá čuovvovaš gaskavahkkui 22.1. dmu 12 rádjái. Almmuhanskovvi lea neahttasiidduin https://www.luontoon.fi. Sávzaguođoheaddjit vuorbáduvvojit almmuheaddjiid gaskkas guovvamánu áigge.
Vuorbbis lihkolaččat besset láigohit doalu dahje stobu vahkkui suopmelaš árbeeanadaga guovdu. Guođoheaddjit besset vásihit dáloneallima guođohemiin sávzzaid, gusaid dahje heasttaid. Guođoheaddjiid doaimmaide gullet earret eará molsut ealliide buhtes čázi, čuovvut ealliid veadjima ja sirdit daid guođohanlaigosis nubbái. Ealliid berre maiddái rehkenastit beaivválaččat, vai vejolaš gárgidan eallit fáhtejuvvojit.
Doalu sturrodaga mielde guođoheaddji sáhttá váldit fárrui bearrašis dahje ustibis. Oassái báikkiide oažžu váldit maiddái biebmoealliid.
Guođohanvahkut leat buorit olbmui ja lundui
Guođohanvahkut buktet máŋggalágan ávkkiid guođoheaddjái ja birastahtti lundui. Vahkku luonddus ja ealliiguin buorida vuostálastinnávcca ja láivuda streassa. Guođohanvahkuide oassálastán olbmot dahket vejolažžan árvvolaš kulturárbebáikkiid, árbevirolaš luonddudikšuma ja luonddu máŋggahámatvuođa seailluheami.
Guođohanvahkut leat mávssu vuollásaččat ja dain boahtán sisaboađut ávkkástallojuvvojit báikkiid bajásdoallamii ja luonddudikšumii.
Lassidieđut:
Hannele Kytö, Meahciráđđehusa Luonddubálvalusat, hannele.kyto@metsa.fi, t. 040 1849709