Bállás–Ylläsduoddara álbmotmeahci Heahttá-Bállás -johtolagas boahtá virggálaččat ruskkahis jagi 2023. Boahttevuođas stobuin dahje vuoiŋŋastansajiin eai gávdno šat ruskalihtit, muhto duvdit vánddardeaddjiid vánddardit ruskkaheamit. Vejolaš ruskkaid sáhttá buktit luondduguovddáža ekočuoggáide.
Dán jagi álbmotmeahci fuolaheaddjit ja vánddardeaddjit oahpahallet ruskkahis vánddardeami. Mihttomearri ruskkahis Heahttá-Bállás -johtolagas jagi siste lea gudneáŋgir, muhto háliidat jáhkkit, ahte juohkehaš fiinna álbmoteanadagas johtti olmmoš oassálastá mihttomeari ollašuhttimii!
Manin ruskalihtit sirdojuvvojit dál eret?
Ruskkahis vánddardeapmi ii leat ođđa ášši, muhto das leat hállan ja dan leat figgan ovddidit jo jahkelogiid. Máŋggain máttaguovllu Suoma álbmotmehciin eai johtolagaid guoras ja dolastallansajiin leat ruskalihtit, muhto ruskkaid galgá fievrridit rehpos ekočuoggáide. Maiddái Bállás-Ylläsduoddara álbmotmeahcis oassi turismaguovddážiid lahka lean báikkiin leat jo ruskkaheamit. Bállás-Ylläsduoddara álbmotmeahcis mannan jagi ollašuhtton galledeaddjidutkamušain bođii ovdan vástideaddjiid sávaldat, ahte ruskkahis vánddardeami vuođđojurdagiid galggašii čuovvut, muhto johtolagaid guoras leat goittotge ruskačuoggát.
Álbmotmeahci davveoasis, gos Heahttá-Bállás -johtolat lea, ain sulaid goalmmadas vástideaddjiin (30 %) lei álbmotmeahcis vuosttas geardde. Galledeaddjimeriid stuorodettiin ruskkahis vánddardeami molssaeaktun livččii ain lasihit ruskačuoggáid. Goittotge Bállás-Ylläsduoddara beaggin Suoma bivnnuheamos álbmotmeahccin geatnegahttá maiddái Meahciráđđehusa ovddidit suvdilis vánddardeami.
Rehppo lea ruskalihtti
Beaivetuvrra smávva seahkažat johtet jo dál álkit rehpuin ovdan ruoktot ja gávdnet geainnus sirrenčuoggáide. Mii diehtit, ahte ruskkahis vánddardemiin vánddardanbáikkiid ruskabáikebázahusat leat geahppánan, vaikke galledeaddjimearit leat sturron. Juohkehaš vánddardeaddji smávva doaimmain leat stuorra váikkuhusat.
Buorre plánemiin vánddardantuvrras šaddan ruskkaid meari sáhttá minimaliseret. Iežas rehpos vejolaš ruskkat johtet unnimus noađuhemiin eret luonddus. Goikehivssegis ruska lea váttisvuohta, go ruskkaid dihtii muđuid komposteremii oaivvilduvvon biobázahus gártá seahkalašbázahusaide ja fievrriduvvot gitta Oului. Luondu maiddái ii leat ruskkaid čiehkanbáiki, nuba geđggiid vuollái ii gánnet čiehkat ruskkaid. Jahkásaččat Heahttá-Bállás stobuin ja vuoiŋŋastanbáikkiin fievrridit stuorra meari seahkalaš bázahusaid, mat eanaš leat biepmuid plastihkka- ja kartoŋŋabázahusat. Bázahusaid fievrrideapmi noađuha luonddu ja buktá luoitimiid máilmmi buhttáseamos áibmui.
Dán jagi váldodeaddu lea ruskkahis vánddardeami stivremis ja dieđiheamis. Heahttá-Bállás –máđija guoras lean stobuide ja vuoiŋŋastanbáikkiide biddjojuvvojit geasi álggus ruskkahis vánddardeapmái láidestan galbbat geasi álggu rájes. Bállás-Ylläsduoddara álbmotmeahci Facebook-siidduin dieđihat áššis suoidnemánu álggu rájes. Sávvat, ahte álbmotmeahci somečuovvut ja johtolagas vánddardan olbmot oassálastet juohkimiin ášši ja iežas ruskkahis vánddardeami geažidemiid.
Dohppe hástalussii ja duvdde du vánddardanguimmiid atnit ávvira min fiinna álbmotmeahcis ja dahkat Heahttá-Bállás -johtolagas ruskkaheame!
#VánddardanEtikeahtta #BállásYlläsduoddaraÁlbmotmeahcci
#RetkiEtiketti #PallasYllästunturinKansallispuisto
Lassedieđut:
Gieddeoaivámuš Inari Ylläsjärvi, Meahciráđđehus Luonddubálvalusat, inari.yllasjarvi(at)metsa.fi, tel. 040 158 1760