Lappi ealáhus- johtalus- ja birasguovddáš (Lappi ebi) kártii giđa áigge lobihis ruskabáikkiid ja almmuhii stáhta eatnamiin gávdnon ruskabáikkiid Meahciráđđehussii. Dákkár báikkit ledje buohkanassii 13.
Go bázahusaid buktiid eai dábálaččat gávnna, čorgenbargu stáhta eatnamiin báhcá Meahciráđđehusa ovddasvástádussan.
– Go báikkit ja čorgemuš lea olu, leat gártan bálkáhit bargui agoartaváldi ja golut leat viehka stuorrá, Meahciráđđehusa eanageavahanáššedovdi Marika Koskiniemi muitala.
– Stuorámus oassi čorgema vuollásaš báikkiin leamašan boares, áigá jo giddejuvvon ruskabáikkiin dahje daid lahkasiin, Koskiniemi dadjá.
Bázahusaid čorgema lassin Meahciráđđehus lea ee. gurren boares ruskabáikkiin stuorra luhčatáŋkkaid ja fievrridan luža áššáigullevaš gieđahallamii ja lihtiid metállačoaggimii. Boares gáivvot ja lihtit luonddus buktet maiddái álo dorvvolašvuođariskka čađa ruosttodettiin omd. lohkkeráhkadusa bokte.
– Leat maiddái eastán boares ruskabáikkiide beassama geainnuid botkemiin, gos dat leamašan vejolaš, Koskiniemi dadjá.
– Čorgenbargguid leat dahkan máŋggain báikkiin jo ovdalge, muhto ođđa ruskkat orrot ain čoggomin daidda, Koskiniemi šálloša.
Bázahusaid gieđahallan lea ordnejuvvon Lappis bures ja earálágan bázahusaide leat iežas čoagginčuoggát. Dávjá bázahusaid guođđin ođđasiidávkkástallanbáikkiide lea nuvttá.
Lappi bázahusfuolahusa gieldaovttastupmi LAPECO dikšu fásta visttiid, luopmovisttiid ja gieldda hálddahus- ja bálvalandoaimmas čoggon servodatbázahusa bázahusfuolahusa bálvalandoaimmaid ja bázahuseiseválddi doaimmaid Eanodagas, Anáris, Gihttelis, Muonás, Pelkosenniemis, Sallas, Suovvaguoikkas, Soađegilis ja Giemajávrris.
– LAPECO bearran bázahusfuolahusa vuođđomávssuin dállodoalut sáhttet ávkkástallat ecoČUOGGÁS 700 kg nuvttá meari mávssuvuollásaš bázahusaide jagis. Dán gánneha buohkaid ávkkástallat milloseappot go doalvut bázahusaid giddejuvvon ruskabáikkiide dahje lundui, Koskiniemi muittuha.
Lassedieđut
Marika Koskiniemi, eanageavahanáššedovdi, marika.koskiniemi@metsa.fi, +358 40 121 7079