Meahciráđđehus lea searvan mielde Suvdilis ruvkedoaimma fierpmádahkii. Suvdilis ruvkedoaimma fierpmádat doaibmá ruvkesuorggi ja dan čanusjoavkkuid ságastallan- ja ovttasbargoforuman. Dat gárgeha ja heiveha Supmii vuogálaš bargoneavvuid vásttoleabbo ja suvdileabbo ruvkedoaimma ovddideapmin sihke sierra ealáhusaid gaskasaš synergiijaid ávkkástallamin ja konflivttaid eastadeapmin.
Meahciráđđehus hálddaša stáhta eana- ja čáhceguovlluid, mat leat buohkanassii 13 miljon hektára. Eanaguovllut leat eanaš Davvi- ja Nuorta-Suomas, go ruvkedoaibma ja dálá oalle ealaskas málbmaohcan lea čoahkkanan.
– Suvdilis ruvkedoaimma fierpmádat gárgeha eanet konkrehta doaibmamálliid, čovdosiid ja vuogádagaid ruvkedoaimma ja málbmaohcama proseassaid buorideami várás. Oassálastimiin fierpmádaga bargui mii váldit ovddasvástádusa das, mo ruvkeáššit ovddiduvvojit Suomas, Meahciráđđehusa rogganáššiidoaivámuš Mika Hytönen dadjá
– Fierpmádaga ja Meahciráđđehusa oktasaš mihttomearrin lea, ahte Suopma ovdána suvdilis ruvkedoaimma ovdavázziriikan, gos suorgi váldá vuhtii luondduárvvuid, kultuvrralaš ja sosiála doaibmabirrasa ja eará ealáhusaid, Hytönen dadjá.
Meahciráđđehusa hálddašan eatnamiidda čuhcet ruvkedoaimma lassin valjit earálágan earáge eanageavahangáibádusat. – Háliidat ovddidit áššiid buoremus vejolaš njuovžilvuođa ovttas iežamet čanusjoavkkuiguin. Fierpmádagas leat mielde ruvkedoaimma lassin maiddái earret eará gielddat, Bálgosiid ovttastus, Suoma luonddusuodjalanlihttu ja WWF, nuba dat lea buorre forum oktasaš ságastallamii.
Fierpmádat figgá dasa, ahte buot dan lahtut ožžot jienaset gullosii ja ipmirduvvojit ja sáhttet váikkuhit fierpmádaga doibmii
– Searvan fierpmádahkii lea oassi Meahciráđđehusa ulbmillaš vásttolašvuođaprográmmas. Vásihat, ahte fierpmádat lea buorre báiki lasihit diđolašvuođa stáhta eatnamiin ja daid geavahanvugiin, Hytönen dadjá.
– Meahciráđđehusa lahttuvuohta lea bures boahtán, go dat lasiha fierpmádaga oktavuođaid gokčevašvuođa eará ealáhusaide ja čanusjoavkkuide. Ruvkedoaimma ja málbmaohcama gieđahaladettiin lea dehálaš, ahte Meahciráđđehus buktá oainnus ságastallamii. Dan deaddoárvu guovlluekonomiija ja barggolašvuođa dáfus lea mearkkašahtti eandaliige Davvi-Suomas, dadjá Eero Yrjö-Koskinen Suvdilis ruvkedoaimma fierpmádagas.
Fierpmádaga sátnejođiheaddjin doaibmá birasministeriija kansliijaoaivámuš Hannele Pokka. Fierpmádaga várresátnejođiheaddji doaibmá Bálgosiid ovttastusa Anne Ollila ja fierpmádaga váldočállin Eero Yrjö-Koskinen. Mika Hytönen doaibmá fierpmádaga stivrras Meahciráđđehusa ovddasteaddjin.
Lassidieđut:
Rogganáššiidoaivámuš, Mika Hytönen, Meahciráđđehusa Giddodatovdáneapmi, 040 722 4417, mika.hytonen@metsa.fi
Fierpmádaga váldočálli, Eero Yrjö-Koskinen, 050 347 8778, eyk@kaivosvastuu.fi
Loga lasi fierpmádagas: Kaivosvastuu.fi (suoma- dahje eŋgelasgillii)