Jahki 2021 lei Meahciráđđehussii sihke ekonomiija ja doaimma dáfus lihkostuvvan. Konseartna fitnodatdoaimma boađus lei 120 miljovnna euro ja investeremat biodiversiteahta dorvvasteapmái ja eará servodatlaš ávkkiide ledje oktiibuot 80 miljovnna euro. Meahciráđđehusa doaibma ovddida maiddái Suoma dálkkádatmihttomeriid ollašuvvama ja láhčá máŋggabealat buresveadjima ovttaskas olbmuide ja maiddái guovlluekonomiijaide.
Meahciráđđehuskonseartna vuovdimat ledje 367,4 miljovnna euro ja boađus 119,9 miljovnna. Meahciráđđehus máksá ovddit jagi bohtosis stáhtii 120 miljon euro.
Buorre bohtosa duohken lea muora nana jearru ja haddi. Stáhta vuvddiin rádje mannan jagi 6,3 miljovnna kubihka muoraid. Mearri lea sulaid vihtta proseantta vuolit go mii luondduriggodatplánain lei meroštallon suvdilis čuohppanplánan jahkái 2021. Seamma áigge fitnodatdoaimma investeremat luonddu máŋggahámatvuođa ovddideapmái ja eará servodatlaš ávkkiide lassánedje 79,7 miljovnna euroi.
“Stáhta lotnolasgeavahanvuvddiin bastit buriin plánemiin ovttastahttit máŋggalágan mihttomeriid. Vuovdedoalus válde mannan jagi atnui bissovaš buorideapmái vuođđuduvvan energiijabeaktilisvuođavuogádaga (ETJ+) ja investerejedje dálkkádatváikkuhusaid unnideapmái ja šládjačehppodahkii go rekryterejedje suorggi áššedovdiid”, muitala Meahciráđđehusa váldohoavda Juha S. Niemelä.
Beroštupmi bieggafápmui lasihii ovdačielggadusaid meari
Giddodatovdáneami boađus lei 21,2 miljovnna euro. Duktásadjefitnodatdoaimmas ja bieggafámu fitnoovddideamis oidne goappásge jearu lassáneami. Ruovtturiikka turismma lassánan bivnnuhisvuohta oidnui bartasajiid jearus, ja lustaáiggeduktásajiid vuvde olahusmeari.
Ođasmuvvi energiija jearru lassána, mii oidnui stáhta eatnamiidda plánejuvvon bieggafápmopárkkaid ovdačielggadusaid lassáneapmin. Stáhta eatnamiin leat dál 138 bieggafápmolágádusa, mat buvttadit energiija 1000 Gwh. Dat vástida sulaid 75 000 šleađggain liggejuvvon bearašviesu jahkásaš šleađgagolahusa. Korsnäs ovddabeallai plánejuvvon vuosttas mearrabieggapárkka fidnoovddideapmi ovdána, ja báráige lea jođus vásttolaš fidnoguoimmi ohcan.
“Bieggafámu fidnoovddideapmi sihke máŋggabealat čitnanjieluid ja vuorkkáid šaddadeapmi ovddidit maiddái Suoma čitnaneutrálavuođamihttomeriid. Min strategalaš mihttomearrin lea dahkat bieggafápmobuvttadeami meari golmmageardásažžan jagi 2030 rádjai ja šaddadit vuvddiid čitnanjieluid ja vuorkkáid 10 proseanttain jagi 2035 rádjai”, Niemelä muitala.
Olahusmearri ovddežiin dikšumat ja luonddudikšunbarggut
Stáhta suodjalanguovlluin ja lotnolasgeavahanvuvddiin dahke luonddudikšun- ja ovddežiin dikšunbargguid ja eallinbirrasiid ordnemiid oktiibuot 16 000 hektára viidodagas. Mihttomearrin lea bajásdoallat ja ovddidit luonddu máŋggahámatvuođa stáhta eatnamiin aktiivvalaš doaimmaiguin ja minimaliseret birrasii čuohcán vahátlaš váikkuhusaid.
Suodjalanguovlluin ovddežiin dikšundoaimmaide ja luonddudikšumii geavahedje Helmi-eallinbirasprográmma ja EU.a LIFE-prošeaktaruhtadeami. Lotnolasgeavahanvuvddiin doaimmaid dahke Meahciráđđehus Vuovdedoallu Os:a iežas ruhtademiin.
Luonddubuđaldusaid bivnnuhisvuohta joatkašuvvá stuorisin
Luonddus lihkadeami ja bivddu bivnnuhisvuohta lassánii ain. Meahciráđđehusa álbmotmehciin, historjáčuozáhagain ja eará áhpásmuhttin- ja vánddardanbáikkiin oktii rehkenastojuvvon galledeaddjimearri lovttai badjel 9 miljovdnii. Luonddubálvalusaide mieđihuvvon sierraruhtademiin baste divvut vánddardanráhkadusaid ja lasihit easttahis bálvalusaid.
Bivdui geavahedje badjel miljonbeale bivdobeaivvi. Galledeaddjimeari lassáneapmi bidjá jo bivnnuheamos báikkiin deaddaga ekologalaš ja sosiála suvdilisvuhtii. Eandalii meahcce- ja guollebivddus lobiid jearru lea báikkuid eanet go lobiid mearri lohpedihtomearis.
“Luonddubuđaldusat buvttadit olbmuide buresveadjima ja galledeaddjimeari lassáneapmi buktá guovlluide maiddái fuopmášahtti ekonomalaš ávkkiid. Luonddu- ja vánddardanbáikkiin galledeaddjiid ruhtageavaheami guovlluekonomalaš váikkuhusaid árvvoštalle leat 465 miljovnna euro mannan jagi”, Niemelä gávnnaha.
Árvvuluovvanmálle govvida doaimma váikkuhusa
Meahciráđđehusa Šaddadat ihtáža –strategiija ollašuhttimis deattuhedje luonddu máŋggahámatvuođa, ođasmuvvi energiija, suvdilis luondduturismma ja áššehasvásáhusa ovddideami.
Árvvuluovvanmálle govvida doaimma váikkuhusa dan bokte, makkár árvvu Meahciráđđehusa doaibma buvttada servodahkii ekonomiija, birrasa ja sosiála geahččanguovlluid ektui.
Meahciráđđehusa doaimmas leat njuolggo váikkuhusat servodahkii earret eará vearuid, bálkkáid, materiála- ja bálvalanoastimiid, investeremiid ja bohtosa máksima bokte sulaid 450 miljovnna euro. Eahpenjuolggo ekonomiijaváikkuhusat šadde skáhppomiid ja olggobealde ostojuvvon barggu árvogollosa ja vejolaš bargosajiid bokte sulaid golbma miljárdda.
Lassedieđut:
Váldohoavda Juha S. Niemelä, tel. 0206 39 4201
Hoavda Terhi Koipijärvi (Gulahallan, strategiija ja vásttolašvuohta), tel. 0206 39 4080