Eanodaga Gilbbesjávrái leat boahtime áidnalunddot viessosajit turismafitnodatdoaimma várás Meahciráđđehusa ja Eanodaga gieldda oktasaš lávvafitnus. Fitnodatviessosajit bohtet njeallje stuhka Gilbbesjávrri gili davábeallái, riikkageaidnu 21 gurrii, Sánajoga ja Gilbbesjávrri lahkosii. Maŋŋeleappos fállun bohtet maiddái fásta orrumii oaivvilduvvon viessosajit.
– Gilbbesjávrris leat ollugat jearahan bearašviessosajiid ja turismaviessosajiid, ja jáhkán, ahte turismaviessosajiin leat eanetge olbmot beroštuvvan. Buohkat eai máhte mis boahtit jearrat lávvavejolašvuođa, juos válmmas viessosajit eai leat, Meahciráđđehusa guovllugeavaheami njunuš áššedovdi Tanja Hämäläinen muitala.
– Viessosajit ásahuvvojit fállun gilvalahttima bokte, man vuođul mii sáhttit árvvoštallat boahttevaš huksema kvalitehta ja heivvolašvuođa báikkálaččat, Hämäläinen joatká.
– Gilvvu mihttomearrin lea hábmet Sánajoga birrasii alla dási turismabálvalusaid guovllu, mii nanne guovlu identitehta, geasuha ollugiid ja doarju Eanodaga gieldda mihttomeari ovddidit turismaealáhussii laktáseaddji bálvalusaid fálu, Eanodaga gielddahoavda Petri Härkönen muitala.
– Gilbbesjávrri guovllus turisma lea sakka lassáneame ja dál bohtet fállun áidnalunddot viessosajit. Dát liiba lea geahččan veara, Härkönen ávžžuha.
– Mii bivdit gilvvu oassálastiin evttohusaid viessosajiid plánemis ja ollašuhttimis. Mihttomearrin lea gávdnat gilvvu čuozáhatviessosajiide arkitektonalaččat alla dási huksenplánaid, maid lea vejolaš ollašuhttit. Plána galgá ovdanbuktit maiddái visuálalaččat nu, ahte das oaidná makkár viessosadji livččii olggos oaidnit oktan doaimmaidisguin. Dasa lassin evttohusain galgá ovdanbuktit, mot viessosadji laktása birrasasas, Hämäläinen joatká.
Guovllu plánemis deattuhit suvdilis ovdáneami čovdosiid ja alla dási turismahuksema, mii vuhtiiváldá birrasa, daningo guovlu lea riikkaviidosaččat árvvolaš eanadagaid lahkosis.
– Muhto mii eat oza dušše plánaid, muhto baicca seammás maiddái daid ollašuhttiid. Gilvvu vuoiti dahje vuoitit galget čatnasit ovddidit guovllu ovttas Meahciráđđehusain ja Eanodaga gielddain, Hämäläinen linnje. Dasa lassin vuoiti dahje vuoitit čatnasit čuovvut Meahciráđđehusa doaibmavuohkerávvaga vásttolaš doaibmamis.
Plánen- ja ollašuhttinjoavkkut, mat válljejuvvojit, galget ráhkkanit joatkkaplánaid áigge heivehit plánaideaset oktii guovllu eará ollašuhttiiguin juksan dihte buoremus loahppabohtosa. Meahciráđđehusas ja Eanodaga gielddas lea riekti bagadit ja evttohit nuppástusaid vuoiti plánaide.
Gilvvu vuoitit galget maiddái láigohit viessosajiid golmma mánotbaji siste dan maŋŋá, go Sánajoga sajádatlávva lea gulahuvvon fápmui. Dán eaktu lea, ahte viessosajit leat válbmasat huksejuvvot.
– Gilvvu bohtosiin mii beassat muitalit geasi álggogeahčen, Hämäläinen ja Härkönen muitaleaba.
Loga eambbo: www.laatumaa.fi/saanajoki
Lassedieđut:
Guovllugeavahusa njunuš áššedovdi Tanja Hämäläinen, Meahciráđđehus, tanja.hamalainen@metsa.fi, tlf. 040 186 9339
Gielddahoavda Petri Härkönen, Eanodaga gielda, petri.harkonen@enontekio.fi