Urho Kekkonen álbmotmeahcci lea ožžon Suoločielgái ođđa čalbmáičuohcci vuolggapoartta. Nu suopmelaš vánddardeaddjit go olgoriikalaš turisttat ožžot justa gárvánan vuolggapoarttas áigeguovdilis dieđuid álbmotmeahcis lihkadeapmái. Vuolggapoarta lea plánejuvvon juo iešalddes oainnusin, vai álbmotmeahcci oidnosii guovllus buorebut go árabut ja olahivččii maiddái guovllus lihkadeaddji riikkaidgaskasaš turisttaid.
– Suoločielggi turismafitnodagat leat sávvan juo jagiid, ahte álbmotmeahcci oidnosii buorebut turisttaide, geat bohtet guvlui áidnalunddot luonddu dihtii, muhto eai vealttekeahttá gávnna álbmotmeahci. Čalbmáičuohcci vuolggapoarta addá dál čovdosa dán hástalussii, dadjá áhpásmuhttingeavahanoaivámuš Pirjo Seurujärvi Meahciráđđehusa Luonddubálvalusain.
Urho Kekkonen álbmotmeahcci, mii dán jagi ávvuda njealjelogi jagi, lea galledeaddjimeriid bealis Suoma nubbin bivnnuhamos. Mannan jagi galledeamit ledje 405 400. Suoločielggi guovllu turisma lea riikkaidgaskasaš: bealli idjademiin bohtet riikkaidgaskasaš turisttain.
Álbmotmeahcci lea duottarluondu, gos lihkadeaddji ferte iežas dorvvolašvuođage dihtii leat ráhkkanan árktalaš diliide. Vuolggapoarttas gávdno diehtu álbmotmeahci luonddus, máđijaiguin ja geavatlaš rávvagat luonddusuodjalanguovllus lihkadeaddjiide. Digišearpmain jorrá vánddardeaddjiid guoskkahan áigeguovdilis ja beaivváiduvvi diehtu ovdamearkka dihtii láhtuid bajásdoallamis.
– Dál dehálaš diehtu oidno bures doppe, gos máđijat vulget. Turisttat dollejit poartta lusa lunddolaččat ja johtet poartta čađa Suoločielggi ja álbmotmeahci máđijaide, ležžet dal jođus muohtagápmagiin, čuoigga, vácci dahje sihkkeliin. Vuolggapoartta vehkiin mii sáhttit nannet turismma ja vánddardeami áššehasdorvvolašvuođa, suvdilisvuođa ja luonddu árvvus atnima ja gudnejahttima dieđu, Seurujärvi muitala.
Vuolggapoartta lea plánen arkiteaktadoaimmahat Neva Oy.
Meahciráđđehusa Luonddubálvalusat vástida álbmotmehciid dikšumis.
Olgoriikalaš turisttat bohtet duoddarii dávjá menddo asehaš biktasiiguin – vuolggapoarta muittuha maiddái dán fáttás
Vuordit Sápmái ealaskas dálveturismasesoŋŋa. Riikkaidgaskasaš turisttat háliidit dávjá galledit maiddái álbmotmehciin. Earenoamážit beaivetuvrrat leat olgoriikalaččaid miela mielde.
Meahciráđđehusa Luonddubálvalusaid áššehasbálvaleamis fuomášit dávjá, ahte Sámi galbma dálkkit hirpmahuhttet olgoriikalaš gussiid.
– Oassi Suoma luonddu čáppášeaddjiin vulget tuvrraide gahpira ja gistáid haga. Álo olbmot eai ádde, ahte makkáraš dálki duoddaris lea, Seurujärvi muitala.
Leat earenoamážit vuhtiiváldán gárvodanrávvagiid maiddái ođđa Urho Kekkonen álbmotmeahci vuolggapoarttas. Earenoamážit leat investeren áiccalmahtti govaide, ahte liegga biktasiid dehálašvuođa ipmirdeapmi ii livččii gitta gielas.
Nubbi ášši, mas jeavddalaččat muittuhit vánddardeaddjiid, lea telefovnna doaibmama eahpesihkkarvuohta. Telefovnna gullon jávká skáiddis jođánit. Buollašis kárta gánneha leat mielde báberveršuvdnan, dasgo telefovnnain sáhttet báhtterat guorranit jođánit.
Luonddubálvalusaid rávvagiid mihttomearrin lea oažžut álbmotmeahcis galledeaddjiid atnit árvvus ja gudnejahttit mávssolaš suodjaluvvon luonddu.
– Ále guođe luottaid, ovdamearkka dihtii ruskkaid dahje daga geađgelánaid. Maiddái dáin muittuhit galledeaddjiid jeavddalaččat, Seurujärvi dadjá.
Geahča makkár vuolggapoarta lea olggosoaidnit, video (instagram.com, suomagillii).
Lassedieđut:
Áhpásmuhttingeavahanoaivámuš Pirjo Seurujärvi, tel. 0206 39 77 04, pirjo.seurujarvi@metsa.fi