Meahciráđđehusa Lappi Luonddubálvalusat álggaha divvunbargguid Rájá-Jovsseba giettis Urho Kekkonen álbmotmeahcis borgemánu álggus. Divvunbarggut dahket vejolažžan kulturhistorjjálaččat divrras ráhkaduskulturmuitobáikkiid seailuma ja maiddái dáid siskko beallái oahpásmuvvama boahttevuođas.
Divvumiid dahket Rájá-Jovsseba stobu ja sávnni gáhtto-, seaidne- ja vuollevuođđoráhkadusaide. Viiddis divvunbargguin burget 1980-logu kreosohtain gieđahallon muorraráhkadusaid, divvot čáhcegáhttoráhkadusaid ja dahket maiddái eanabargguid ráhkadusaid birra. Bargu galggašii leat gárvvis čavčča áigge. Divvunbargguid áigái birrasa suddjejit, dasgo šiljus leat divrras, áitatvuloš niitošlájat. Rájá-Jovsseba gieddi bissu rabas galledanbáikin maiddái divvunbargguid áigge. Bargoeatnama guovllu ráddjejit áiddiin iige doppe lihkadeapmi leat lobálaš.
Rájá-Jovsseba gieddi lea riikkaviidosaččat mearkkašahtti ráhkaduskulturmuitobáiki ja dat lea stáhtaráđi mearrádusain suodjaluvvon. Gieddi lea Lohtu guoras, áibbas Ruošša rájá lahka. Šillju lea bisson measta seammaláganin gitta 1900-logu álggus ja dat lea bures seilon ovdamearka meahcceássamis Sámis. Dálu ássit Joosef Sallila ja su guoibmi Matilda Lehikoinen bohte sulaid jagis 1910 Lohtu dearbmái, gosa soai huksiiba iežas gieđaiguin logi jagi áigge máŋggaid ráhkadusaid. Ealáhussan ledje golleroggan, bearralbivdin, guolásteapmi, meahcásteapmi ja boazodoallu. Báikái válde maiddái soames gusaid ja sávzzaid.
Rájá-Jovsseba restaurerenbargguid ollašuhttá Entisöinti Rinne Oy. Ruhtadus báikki divvumii lea sierraruhtadus stáhta lassebušeahttaárvalusas ja stáhta bušeahttaruhtadeamis.
Lassedieđut
- Huksenárbbi plánejeaddji, Johanna Peuraniemi, Meahciráđđehus, tel. 0401581254
- Agoartaváldi Tuomo Rinne, Entisöinti Rinne Oy, tel. 0400354398
- Rájá-Jovsseba gieddi (lundui.fi)
- Urho Kekkosen álbmotmeahcci (lundui.fi)