Meahciráđđehusa biras- ja innovašuvdnabálkkašupmi jagi 2023 lea mieđihuvvon Lotnolasgeavahanvuvddiid šlájaidkártenfidnui. Fidnu vehkiin leat ožžon mearkkašahtti lassedieđu máŋggaid áitatvuloš šlájaid dihttomis ekonomiijageavahusas leamašan stáhta vuvddiin. Čielggadus bálvala máŋggahámatvuođabarggu mii dahkkojuvvo Meahciráđđehusa lotnolasgeavahanvuvddiin ja dan bohtosiid sáhttá atnit ávkin viidásutge máŋggahámatvuođa ja luondduváriid suvdilis geavaheami oktiiheiveheamis.
Šlájaidkártenfidnus čielggaduvvui áitatvuloš ja earáid fuomášan veara šlájaid dihttoma stáhta lotnolasgeavahanvuvddiin. Diehtu šlájain ja šlájaid eallinbirasgáibádusain lea dehálaš, go vuvddiid geavaheamis oktiiheivehit vuovdedoalu hárjeheapmái ja máŋggahámatvuođa suodjaleapmái ásahuvvon mihttomeriid.
-Bálggesčuolli kártenfidnu lea buvttadan ođđa dieđu árabut funet dovddus temás. Ovttas almmolaš šládjadieđu buvttademiin čielggadus bálvala stáhta lotnolasgeavahanvuvddiin dahkkojuvvon máŋggahámatvuođabarggu ja dan bohtosat leat ávkin olles vuovde- ja luondduvárresuorgái, gávnnaha Meahciráđđehusa váldohoavda Juha S. Niemelä bálkkašumi ákkain.
Fidnus mii ollašuhttui Meahciráđđehusa vuovdedoalu šládjaáššedovdiid jođiheami vuolde dahkkojuvvojedje jagiin 2022 ja 2023 šlájaidkártemat oktiibuot 230:s stáhta lotnolasgeavahanvuvddiid čuozáhagas. Deivvolaččat válljejuvvon čuozáhagat ledje Lappis, Kainuus ja Jávre-Suomas.
Mihttomearrin lei čoaggit systemáhtalaččat šládjadieđu dikšojuvvon vuvddiin ja oažžut nu dárkkálmahtton dieđu áitatvuloš šlájaid dihttomis sierralágan vuovdečuozáhagain. Fidnu bohtosat leat buktán lassedieđu máŋggaid šlájaid dábálašvuođas ja eallinbirasgáibádusain. Dieđu sáhttá atnit ávkin vuvddiid luonddudikšumis ja dat addá vuođu maiddái viidásut čielggadus- ja dutkanbargui máŋggahámatvuođa ja luondduváriid suvdilis geavaheami oktiiheiveheamis.
Biras- ja innovašuvdnabálkkašupmi luobahuvvui 13.5. Meahciráđđehus Vuovdedoallu Oy:a šládjaáššedovdiide Tuomas Kallioi ja Pyry Vetelii, geaid máhttin ja nana áššedovdámuš lea leamašan fidnu lihkostuvvama eaktu.
Meahciráđđehusa vuovdedoallu lea mannan jagiin áŋgiruššan eanet šládjaáššiin bálkádemiin šládjaáššedovdiid, ovddidemiin áitatvuloš šlájaid vuhtiiváldimii laktásan rávvagiid ja skuvlemin bargoveaga. Dárkilut šládjadieđu vuođul leat sáhttán gárvvistit vuvddiid gieđahallanmálliid mat vuhtiiváldet ja suodjalit šlájaid. Fidnu vuođul sáhttit vel buoridit doaibmama kvalitehta rávvagiid dárkkálmahttimiin ja skuvlejumiid vehkiin.
-Kártemiid vuođul oassi šlájain orrot menestuvvamin máŋggalágan dikšojuvvon vuvddiin ja danin dihttomat dain čoggojedje vuorddekeahtes olu. Earenoamáš fuomášumi ferte giddet boares vuvddiid mihtilmas ja hárvenaš šlájaid vuhtiiváldimii, muitala šládjaáššedovdi Tuomas Kallio.
Biras- ja innovašuvdnabálkkašumiin Meahciráđđehus háliida movttiidahttit iežas bargoveaga ovddidit innovatiiva ja luonddudili ovddideaddji čovdosiid. Bálkkašupmi mieđihuvvo jahkásaččat olbmui, jovkui dahje fidnui, gii/mii ovddida innovašuvnna, doaibmama dahje álgaga bokte Meahciráđđehusa guovddáš birasmihttomeriid dego luonddu máŋggahámatvuođa lasiheami, dálkkádatnuppástusa goahcama, luondduváriid suvdilis dikšuma, suvdilis luondduturismma ja birassuodjaleami.
Lassedieđut:
Ovddidanhoavda Johanna Leinonen, šleađgapoasta: johanna.leinonen(at)metsa.fi, tel. 0407309114
Šládjaáššedovdi Tuomas Kallio, šleađgapoasta: tuomas.kallio(at)metsa.fi, tel. 0405486023