Oktasašdieđáhus Meahciráđđehusa Luonddubálvalusat ja WWF Suopma
Norggas, Ruoŧas ja Suomas sihkkaraste mánnan gease oktiibuot 164 njálabessema. Okta bessemiin lei Eanodaga duottarguovllus, go mannan gease njála bessen lihkostuvai vuosttas geardde jagi 1996 rájes. Bessenbohtosat ledje olahuslaččat maiddái Ruoŧas ja Norggas. Njálačivggaid gávnnahedje mannan jagi golmma riikka guovllus oktiibuot 762.
Njálla lea Suomas ain earenoamáš áittavuloš ja Norggas ja Ruoŧas dat lea hui áittavuloš.
– Moaddelot jagi dahkkon suodjalanbarggu bohtosat oidnojit illudahtti vugiin njála bessemiin mannan gease. Suodjalanbarggu galgá goittotge systemáhtalaččat joatkit. Ovdamearkan liegganeaddji dálkkádat lea áitta ealaskuvvi njállanállái, dadjá alladárkkisteaddji Tuomo Ollila Meahciráđđehusa Luonddubálvalusain.
Meahciráđđehusa Luonddubálvalusat vástida njállanáli čuovvumis ja geavadaga suodjalandoaimmain Suomas. WWF doarju sihke čuovvunbarggu ja geavadaga suodjalandoaimmaid, dego njála biebmanstašuvnnaid bajásdoallama Duottar-Sámis.
– Vuordimis lea buorre muolddat- ja goddesáhpánjahki, mii einnosta lasi njála bessemiid Suomas. Vaikke njálat borret buriin borranmielain biebmanstašuvnnaid beatnatbiepmuid, muolddahat ja goddesáhpánat leat njálaid lunddolaš biebmu, maiguin bessengeahččaleapmái dábálaččat easkka álget, muitala prográmmahoavda Petteri Tolvanen WWF:s.
Mannan gease bessenstatistihkat leat Ruoŧa, Norgga ja Suoma oktasaš njállaraporttas, man dahkamis Suopma lea dál mielde vuosttas geardde. Raporttas muitalit njállanáli čuovvunbarggus ja dan bohtosiin (raporta suomagillii siiddu 41 rájes). Ruoŧŧa ja Norga leat almmustahttán oktasaš njállaraportta jagi 2018 rájes.
Golmma riikka oktasaš raporta lea čuovvumuš ain čavgasat ovttasbarggus, mii dahkko Suoma, Ruoŧa ja Norgga gaskkas njála suodjaleami ovdii. Oktasaš raportta lassin gárvvisteami vuolde lea riikkaid oktasaš njála suodjalanprográmma, mas boahtit meroštallat šlája suodjaleami mihttomeriid ja vugiid boahttevaš jagiide.
Njálaid mearri lea lassánan davviguovlluin olles 2000-logu áigge. Jahkeduháha molsašumis njálaid mearrin árvvoštalle golmma riikkas 40-60 ealli ja dál náli sturrodahkan árvvoštallet 599 ráves njála. Okta mearkkašahtti dahkki njállanáli nanosmuvvamis lea gárddiin šaddan, luonddunáli ovddastan njálaid luoitin Norgga, Suoma ja Ruoŧa rájáid lahkasii. Suomasge mannan gease čivgan njállanjiŋŋálas orru leamen DNA-čájáhusa vuođul jagi 2018 Várjjagis luitojuvvon njála maŋisboahtti.
Lassedieđut:
Luonddusuodjaleami sierraáššedovdi Tuomo Ollila, Meahciráđđehus Luonddubálvalusat, tel. 0400 241 448, tuomo.ollila@metsa.fi
Prográmmahoavda Petteri Tolvanen, WWF Suopma, tel. 0400 168 939, petteri.tolvanen@wwf.fi