Meahciráđđehusa doaimma sámiid ruovttuguovllus jagiin 2022–2027 láiden plána gárvvisteapmi álggii. Plána ovttasbargojoavku čoahkkanii vuosttas geardde ja čalmmustahtii guvlui laktásan dárbbuid ja oainnuid. Čanusjoavkkuid gullan joatkašuvvá skábmamánus temájoavkkuid deaivvademiin. Juovlamánus ordnejuvvon nuoraid bargobájis guovllu 8-luohká oahppit besset muitalit, mii sin mielas lea dehálaš vuhtiiváldot plánemis.
Luondduriggodatplánain heivehat oktii stáhtaoamasteaddji Meahciráđđehussii ásahan mihttomeriid báikkálaš mihttomeriide. Guovddáš oktasašplánema bargoneavvu lea ovttasbargojoavku, masa oassálastet guovddáš doaibmit. Ovttasbargojoavku smiehttá njealji bargobájis luondduváriid dikšuma ja ávkkástallama ja doaimma linnjemiid plánaguovllus.
Vuosttas bargobádji ordnejuvvui gaskavahku 21.10. Dálá pandemiijadili dihtii gáiddusoktavuođain ordnejuvvon bargobájis badjánedje ságastallamii olu áššit luondduriggodatplánema gieđahallamii. Dát gusket turismma, eanageavaheami, meahcce- ja guollebivddu, boazodoalu ja vánddardeami.
Dilálašvuođas ságastalle lassánan riikkaidgaskasaš turismma váikkuhusain ja sávve turismadoaibmiin vásttolašvuođa, njuolggadusaid ja davvi dábiid gudnejahttán doaimma. Ságastallamis badjánii maiddái lassánan ruovtturiikka turisma ja vánddardančuozáhagaid fuolaheami reahkkán. Meahciráđđehusas sávve čielga ja doarvái olu vánddardanmáđijaid ja –ráhkadusaid ja buoret bearráigeahču, vai vánddardeaddjit ja meahccesihkkelastit bissot lobálaš máđijain.
Ságastallamii oassálastán lahtut vásihedje, ahte turismadoaibmiin ii leat doarvái diehtu guovllus ja dan árbevirolaš ealáhusain. Beanaleaŋggus- ja mohtorgielkásafáriid lassáneapmi vásihuvvui váttisvuohtan boazodollui. Maiddái meahcástanbeatnagiid boazodollui mielddisbuktán hehttehusat hálahedje.
Ovttasbargojoavkkus sávve eakti ságastallama eará doaibmiid gaskkas ja rabas árvoságastallama mihttomeriin soahpamii. Oassálastima dehálašvuohta earuhuvvui maiddái duktásajiid vuovdimis dahje láigoheamis, lávvaplánemis, vuovdedoalu plánemis ja eará eanageavaheami plánemis. Eandalii sávve, ahte vuovdedoalloplánat bálgosiid guovdu dahkkojuvvojit ovttasbarggus, ovttaskas áššiid mielde ja čielgasit, amas eai boađe boasttu áddejumit.
Nuoraid jienat gullosii
Dehálaš oktasašplánema vuogit leat bargobájit, main okta lea plánejuvvon guovllu nuoraide. Bargobájis nuorat oassálastet iežaset ássanguovlluset eana- ja čáhceguovlluid ávkkástallama plánemii ja ožžot áigeguovdilis dieđuid guovllu eanageavaheapmái ja luondduváriide laktásan áššiin. Lassin nuorat ožžot vejolašvuođa oahppat oktiiheiveheamis ja ráđđádallamis ja buktit ovdan iežaset oaiviliid.
Nuoraid bargobádjái leat bovdejuvvon buot guovllu 8-luohká oahppit skuvllaideasetguin. Bargobádji ordnejuvvo gáiddusoktavuođain juovlamánus.
Temájoavkkuin áššedovdamuš plánemii
Plánema ovdánettiin ordnejuvvojit bargobájit maiddái temájoavkkuide. Bargobájiin smiehttat dihto temáid vuolde luondduriggodatplánemii laktásan áššiid. Temájoavkkuide oassálastet gielddaid ovddasteaddjit sihke ealáhusaiguin ja luonddu suvdilis ávkkástallamiin, áhpásmuhttimiin ja turismmain ja kulturárbbiin doaibman olbmot.
Ovttasbargojoavkku, nuoraid bargobáji ja temájoavkkuid lassin dahkko buohkaide rabas neahttavuđot kártajearahallan, mas dieđihuvvo maŋŋelis.
Ovttasbargojoavkku bálddas doaibmá Sámedikki nammadan Akwè: Kon -bargojoavku, mainna sihkkarastojuvvo, ahte sámekultuvrra hárjeheami eavttut váldojuvvojit vuhtii plánas nu bures go vejolaš.
Vuovdedoalu vuogit ja doaimma mihttu meroštallojuvvo vuovdebálgosiid guovdu ordnejuvvon ráđđádallamiin. Vuosttas oktasašdeaivvadeapmi ordnejuvvo skábmamánus.
Lassedieđuid luondduriggodatplánemis sámiid ruovttuguovllus addet:
Prošeaktaoaivámuš Olli Lipponen, t. 0407384408, olli.lipponen@metsa.fi
Stivrenjoavkku sátnejođiheaddji Jyrki Tolonen, t. 0400388609, jyrki.tolonen@metsa.fi