Aanrest åårrai Väʹččer poostvuuʹd håidd- da ââʹnnemplaanhäämas lij valmštõvvum, da ååʹn tõʹst vuäitt ceäʹlǩǩed miõlljurddjes. Plaanâst liʹnnjeet vuuʹdest tueʹjjeemnalla åårrai tuåimid da vuuʹd âânnmõõžž puõʹtti 10-20 eeʹǩǩed vääras.
Väʹččer poostvuʹvdd lij vääžnai sääʹmkulttuuʹre di puäʒʒhoiddu da miârkteei luâđastjååʹttem- da skååttrdemvuʹvdd. Tõõzz koʹlle Aanarjääuʹr nuõrttvueʹzzi mooččâs reedd da määŋg suõllu di veeidas jääuʹr ääppalpeällsaž pieʹccmieʹcci, jieʹǧǧi da čaaʹcci mosaiikk. Poostvuuʹd ääppalvueʹss, jiõčč Väʹččer õllâs, kaggââtt muõrteʹmes čeäʹrren. Obbvuõđâst vuuʹd šorrâdvuõtt lij nuʹtt 1570 km2 da Väʹččer lij Lappi poostaivuuʹdin viiđad šuurmõs.
Väʹččrest lie vitt ǩeâmp luâđastjooʹttjid da muäʹdd kåvvaz, kueʹđ da tollraajjâmsââʹjj. Ooʹbbdneǩvueʹzzest jåått muäʹddlååi ǩilomettar kookka Piilola ǩieʹssluâđâstjååʹttemǩeäinn. Ânnʼjõž kääzzkõsraajõõzz seeiltet jueʹtǩest še.
Väʹččer poostaivuuʹdest jåʹtte pâʹjjel 90 ǩilomettar motorǩeâlkkraʹnni. Plaaneem lopp-pooddâst vuåǯǯuš čõõlmâsjooukin ehdtõs Njeäʹllmest Čeʹvetjääuʹr årra jooʹtti motorǩeâlkkraʹnni loopptummšest. Še tõʹst raaukât ceäʹlǩǩed seämmast ko mainstet jurddi puk håidd- da ââʹnnemplaanâst. Ääʹšš räʹtǩǩeet ceâlkâlmkõrvvi mâŋŋa, poka puk intressjoouk lie kullum.
Plaanhämmsest liʹnnjeet še vuuʹd måttmi ââʹnnemååʹblǩi lååʹpptuʹmmjõõzz. Ouddmiârkkân juõʹǩǩka vuõiggâdvuõđid râstldeei piânnairäiddtuåimmjummša jeäʹt miõttu looʹvid poostvuuʹd maaddjânnamvoudda. Lââʹssen plaanin ohjjeet valdia jânnmid kuõskki ââʹnnemvuõiggâdvuõđid ouddmõõžžâst jeeʹresnallšem kõhttpaaiʹǩi diõtt.
Veeidas vuässõõttmõš plaanummša
Plaanummšest lij leämmaš mieʹldd veiddsõs, vuuʹd kõskksa čõõlmâsjooukin rajjum õhttsažtuâjj-joukk. Õhttsažtuâjj-jooukâst lie leämmaš mieʹldd jeäʹrbi mieʹldd kååʹdd luâđsuõjjeem, mieʹcstummuž- da kueʹllšeeʹllemtuåimmjeei di puäʒʒtääl eeʹttiǩ.
Väʹččer poostvuuʹd kollai obbvuõđstes säʹmmlai dommvoudda da miâlggâd vooʹps sääʹmlääʹjj meâldlaž sääʹmvoudda. Plaaneemtuâjj lij rajjum õhttsažtuâjast še Sääʹmteeʹǧǧin da Säʹmmlai siidsåbbar nõõmtum Akšé:Kon –tuâjj-jooukin.
Väʹččer, mâʹte še jeärraz poostvuuʹd, lij aalǥtum vuuʹdi poostainallšemvuõđ seeiltem diõtt, sääʹmkulttuur da luâttjieʹllemǩeäini staanâm diõtt da luâđ määŋgpeällsaž ââʹnnem da tõn oudldõõzzi ooudâsviikkâm diõtt. Poostaijânnamlääʹjj mieʹldd Meäʹcchalltõõzzâst âlgg raajjâd pukid poostaivuuʹdid håidd- da ââʹnnemplaan, koon nâânad pirrõsministeria. Oouʹdab plaan lij eeʹjjest 2007.
Plaaʹne vuäitt tobdstõõttâd Meäʹcchalltõõzz neʹttseeidain
Väʹččer poostvuuʹd håidd- da ââʹnnemplaanhämmsest vuäitt uʹvdded ceâlkalm 20.2.2020 räjja. Plaan lij vueiʹnnemnalla Meäʹcchalltõõzz neʹttseeidain. Ceâlklmid da jurddjid raaukât vuõltteed neʹttpååʹšt mieʹldd addrõʹsse kirjaamo(at)metsa.fi leʹbe ǩeeʹrj mieʹldd addrõʹsse Metsähallitus/Kirjaamo, PL 94, 01301 Vantaa.
Lââʹssteâtt
Spesiaalplaaneei Liinu Törvi, teʹlfon 040 7541512, neʹttpåʹštt liinu.torvi(at)metsa.fi
- Plaanhäämas
- Väʹččer poostvuʹvdd (www.lundui.fi)