Miehtan oamehasa gunaid botkkuheapmái
Hávdádandoaibmaláhka
Hávdádandoaibmalágas ásahuvvo olbmo rupmaša hávdádeamis ja gudnemis ja gunaid gieđahallamis. Lágas lea ásahuvvon krematoriija bajásdoalli geatnegasvuođain gunaid luobaheamis, gunaid hávdádeamis dahje eará dábiin sajušteamis sihke gudnema ja gunaid sajušteami registreremis. Gunaid sajušteapmái gáibiduvvo eananoamasteaddji dahje -hálddašeaddji miehtan.
Hávdádandoaibmalága vuolggasadji lea dat, ahte gunaid ii sáhte guođđit bissovaččat hávdádeami dahje botkkuheami haga, muhto gunaid galgá jagi siste gudnemis hávdádit dahje eará dábiin sajuštit bissovaččat ovtta sadjái. Hávdeeatnamii sajušteami molssaeaktun gunaid sáhttá ovdamearkka dihtii botkkuhit čázádahkii dahje eatnamii dahje hávdádit juogo urtna haga dahje urtnas dahje eará giesaldagas eatnamii. Gunaid ii sáhte juohkit ja sajuštit eará báikkiide. Vejolašvuohta sajuštit gunaid eará sadjái go hávdeeatnamii dahje priváhtta hávdái guoská dušše beare dakkáraš sajuštanbáikkiid, main báikki ii sáhte maŋálgihtii vuohttit hávdin. Jos báikái ceggejuvvo hávdemuitomearka dahje dohko báhcá juoga eará oinnolaš mearka hávddis, galgá gunaid sajušteami várás vuođđudit priváhtta hávddi.
Ovdal gunaid luobaheami krematoriijas luobaheami oažžu galgá registtardoallama várás almmuhit čálalaččat krematoriija bajásdoallái dieđuid váinnis ja dieđu das, gosa ovtta sadjái váinni gunat bissovaččat sajuštuvvojit. Krematoriija bajásdoallis lea geatnegasvuohta doallat registara almmuhusain, vai váinni lagaš olbmot ja earát oassebealit sáhttet maŋŋeleappos čielggadit gunaid sajuštanbáikki ja -dábi krematoriija arkiivvas. Lassin registarii merkejuvvo diehtu, ahte gunaid sajušteapmái lea ožžojuvvon guovllu oamasteaddji dahje hálddašeaddji miehtan.
Gunaid sajušteapmi hávdeeatnanguovlluid olggobeallái dáhpáhuvvá sajušteamis vástidan olbmo ovddasvástádussan. Gunaid sajušteapmi ii moge ráddje guovllu oamasteaddji vuoigatvuođa mearridit guovllu boahttevaš geavaheamis. Sajušteamis fuolahan olbmos ii maid leat vuoigatvuohta cegget gunaid sajuštanbáikái hávdemuitomearkkaid dahje earáid ráhkadusaid iige vuoigatvuohta hábmet gunaid sajuštanbáikki eanavuođu.
Meahciráđđehusa miehtama addin
Vuolggasadji lea ahte bivdagat oažžut sajuštit gunaid Meahciráđđehusa hálddus lean guovlluide váldojuvvojit vuostá miehtemielalaččat. Miehtamat addojuvvojit eanaš dušše gunaid botkkuheapmái, eai hávdádeapmái. Miehtamat addojuvvojit čálalaččat. Meahciráđđehus addá dieđuid gunaid sajuštanbáikkiin dušše beare áššeosolaččaide.
Ohcamušat sáddejuvvojit Meahciráđđehusa registrerenkantuvrii šleađgapoasttain čujuhussii kirjaamo(at)metsa.fi dahje reivviin čujuhussii Metsähallitus / kirjaamo, PL 80, 00521 Helsinki.
Ohcamušas galgá almmuhit hávdádanordnemiin vástidan olbmo nama ja oktavuođadieđuid, váinni dievaslaš nama ja riegádanáigi ja dieđu háliiduvvon sajuštanbáikkis (omd. kártamielddusin).
Meahciráđđehusa miehtan gunaid botkkuheapmái lea luonddustis bealis eanaoamasteaddji/-hálddašeaddji miehtan iige váidingelbbolaš hálddahusmearrádus.