Meahciráđđehusa doaimma ruhtadeapmi

Meahciráđđehus lea stáhta fitnodatlágádus, mas leat sihke fitnodatdoaibma ja almmolaš hálddahusbarggut. Almmolaš hálddahusbarggut, maidda gullet earret eará luonddusuodjalanguovlluid dikšun ja vánddardanráhkadusaid bajásdoallan, dikšojuvvojit sierra fitnodatdoaimmas ja maiddái bargguid ruhtadeapmi lea sierranahttojuvvon. Fitnodatdoaimmas ožžojuvvon sisaboađuid ii sáhte geavahit almmolaš hálddahusbargguid ruhtadeapmái.

Almmolaš hálddahusbargguid dikšot Luonddubálvalusat ja Meahccebálvalusat. Luonddubálvalusat vástidit earret eará luonddusuodjalanguovlluid dikšumis ja nuvttá vánddardanbálvalusain, ja dan doaibma ruhtaduvvo stáhta bušeahttaváriiguin. Riikkabeaivvit mearridit ruhtadeamis jahkásaččat stáhta bušeahttaárvalusa oktavuođas.

Meahccebálvalusaid bargguin meahccebivdo- ja guolástanáššiid dikšun ruhtaduvvo lohpesisaboađuiguin. Lohpesisaboađut geavahuvvojit fuođđoealliid ja guliid eallinbirrasiid divodeapmái ja guollenáliid dikšumii. Meahccebálvalusat vástidit maiddái stáhta eatnamiid meahccebearráigeahčus. Dan ruhtadeamis mearriduvvo stáhta bušeahttaárvalusa oktavuođas.

Meahciráđđehusa fitnodatdoaibma lea muoraid vuovdin, stáhta eanan- ja čáhceguovlluid láigohan-, vuovdin- ja ovddidandoaibma ja vuovdemuoraid siepmanbuvttadeapmi. Stuorámus oassi gávpejođus boahtá muoraid vuovdimis ja giddodatfitnodatdoaimmas, masa gullá viessosajiid vuovdin ja láigoheapmi ja bieggafámu fidnoovddideapmi. Stáhta fitnodatlágádussan Meahciráđđehus merke stuorámus oasi fitnodatdoaimmas ožžojuvvon vuoittus sisaboahtun stáhta kássii. Maŋimuš jagiid vuoittut leat merkejuvvon sisaboahtun sullii 120 miljovnna euro. Stáhtaráđđi mearrida jahkásaš vuoittuid merkemis sisaboahtun dohkkehettiinis Meahciráđđehusa rehketdoalloloahpahusa.